有一天，大眼仔和大面妹一起去吃飯。到了餐廳搭了張大枱，兩個人望着菜單有點惆悵，諗唔到食乜。過咗一陣，大眼仔提議說「不如食沙葛啦。」大面妹說「好啊，食埋豆角好唔好？」大眼仔說「我唔鍾意食豆角。」大面妹說「但係我鍾意食豆角。」大眼仔即刻雙手抱着頭，一面挫敗苦惱，幽幽地說「咁你揀啦。」

大面妹聽完感到有一道氣上咗嚟，卡住喺喉嚨冇發出來，仲強作鎮定，嗌左四個餸（冇包括豆角）。呢個時候一枱客人已感受到氣氛嘅轉變……

點完菜後，大眼仔仲未發現自己一句激嬲左大面妹。湯上來了，兩人飲湯，大眼仔先留意到大眼妹嘅氣場唔同咗，問「你係咪唔舒服啊？」呢個時候，大面妹按捺不住爆發了，「點菜嘅過程我好唔開心，你可以講唔鍾意食乜嘢，點解我唔可以講我鍾意食乜嘢？！你雙手抱着頭俾我點晒，係咩意思啊？！係咪passive aggressive啊？！」

大眼仔心諗，中伏啦……心裏知道這是誤會（當時自己唔想食但願意俾大眼妹揀自己想食乜，眼見趕時間，才半放棄地俾佢點）。佢都知道呢個時候解釋一定冇用！！但係要佢好好聆聽大面妹嘅指責佢又好唔願意。

佢沉默了半晌，內心掙扎了一番，默默聆聽自己嘅需要，同理自己希望被理解當初嘅心意。大眼仔連結和照顧自己心情和需要後，有番心力聆聽大面妹說，「你係唔係好想我哋一齊食飯點菜都有商有量啊？」

大面妹說「咁係呀嘛，一齊食飯點菜唔開心，咁做乜要一齊食呀？不如分開點菜，自己食自己嗰啲算啦！」

大眼仔就話，「所以我哋一齊食飯點菜係好重要咖，係唔係啊？」

「咁梗係啦，梗係要一齊點啦，點可以我一個人點晒啊？」

「我知道啦，我哋一齊嘅時候有個togetherness 係好重要嘅，係唔係呀?」

「係呀，咁你頭先點解俾我點晒啊?」

呢個時候大眼仔見到大面妹主動問起，判斷佢已經得到足夠的聆聽，所以才想了解當時發生咩事和大眼仔嘅想法，大眼仔心裏很開心，開始解釋剛才自己嘅心情和狀態。

點知大面妹聽左一陣好氣憤，「咁你唔講我點知啊？ ！我唔係你肚裏面條蟲囉！」

大眼仔眼見大面妹又受刺激，已轉回需要聆聽嘅狀態，佢轉念後說「所以當時你唔知我諗緊乜而我又請妳點菜，你係過程入面好唔鍾意那份孤單和焦慮，係唔係呀？」

大面妹聽後忍不住笑左，回答說「係呀。」

呢個時候大眼仔知道已氹番大面妹，說「你開心番，係咪因為發現自己係頭先嘅對話入邊備受關愛啊?」

大面妹笑着點了點頭。

佢哋和好如初。同枱食客已經換了一輪。